شرم برم
شرم برم
احمد فؤاد نجم
انا الأديب الأدباتي
غايظني حال بلدياتي
و غلبت اوحوح و اهاتي
لكن بلدنا سمعها تقيل
الله الله يا بدوي
هات الشخاليل
***
شرم برم و الناس غافله
و الغفله ع الأفهام قافله
و الكدب لعلع في الحفله
و اغلب السامر مساطيل
الله الله يا بدوي
دق الشخاليل
***
حالتنا ما تسرش انسان
و حالنا يصعب ع الغلبان
لكن يا خلق علينا لسان
لو جريناه ع الصلب يسيل
الله الله يا بلدي
يام الشخاليل
***
السوس نخب سقف العشه
و عضمه النغمات هشه
عايزين صابونه و مقشه
و هات يا كنس و هات يا غسيل
الله الله يا بلدي
مشوارنا طويل
***
آدي العباره يا متولي
و ادي اللي تملي
توجع و تتعب و تخلي
عرق الغضب
زلومه فيل
الله الله يا بدوي
لم الشخاليل
posted by maro @ 5:30 PM
0 comments
